Арилжааны банкууд олон улсын зах зээлээс санхүүжилт татлаа

Монголын арилжааны хоёр банк олон улсын зах зээлээс амжилттай санхүүжилт татан төвлөрүүлж, санхүүгийн эх үүсвэрээ төрөлжүүлэх, жижиг, дунд бизнесийг дэмжих боломжоо өргөтгөлөө. М банк анх удаа Сингапурын хөрөнгийн бирж (SGX)-ээр дамжуулан 100 сая ам.долларын бондыг олон улсын зах зээлд гаргаж, амжилттай татан төвлөрүүлсэн байна. Уг бондын арилжаа, зохион байгуулалтад J.P. Morgan болон Seaport Global хамтран ажилласан юм. Тус банк уг санхүүжилтийг зээлийн эх үүсвэрээ нэмэгдүүлэх, үйл ажиллагаагаа тэлэх, ялангуяа жижиг, дунд бизнесүүдэд чиглэсэн зээлийн багц, тэр дундаа ногоон зээлийг хөгжүүлэхэд ашиглахаар төлөвлөж байна. Үүний зэрэгцээ Голомт банк олон улсад нэр хүндтэй хөрөнгө оруулалтын сан болох Triple Jump-аас 5.8 сая ам.долларын урт хугацаат санхүүжилтийг татан төвлөрүүлжээ. Тус санхүүжилт нь бичил, жижиг, дунд бизнесийн зээлийн хүртээмжийг нэмэгдүүлэх, өрхийн аж ахуй, худалдаа, үйлдвэрлэлийг дэмжихэд чиглэнэ гэж банкнаас мэдээлэв. Банкнуудын эх үүсвэрийн бүтэц төрөлжсөнөөр бодит эдийн засаг, ялангуяа жижиг, дунд бизнесийг дэмжих зээлийн боломж дунд хугацаанд нэмэгдэх хүлээлт үүсгэж байна.