Онгоцны ослоос амьд үлдсэн онгоцны үйлчлэгчээ хийсээр байх болно гэв.
Яг 41 жилийн өмнө өнөөдөр JAL-ийн 123 дугаар нислэг осолдож, 520 хүн амиа алджээ. Харин амралтынхаа өдөр зорчиж явсан онгоцны үйлчлэгч дөрвөн хүнтэй хамт амьд үлдсэн юм.
Түүний нэрийг Юми Очиай гэдэг. Тэр үед 26 настай, дөнгөж гэрлэсэн бөгөөд амралтынхаа өдөр 56C суудалд сэтгүүл уншин, Осака руу гэр лүүгээ нисэж явжээ.
Хөөрснөөс 12 минутын дараа онгоцонд хүчтэй дэлбэрэлт мэт дуу гарч, арын ариун цэврийн өрөөний дээрх тааз цөмрөн, хүчилтөрөгчийн маскууд унажээ.
Амралтын өдөр байсан ч Юми ажилдаа орсон мэт зорчигчдод тусалж, аврах хантааз өмсөхөд нь дэмжин, хамгаалалтын бүсээ зүүсэн эсэхийг шалгаж байв.
Boeing 747 онгоц сүүл хэсгээ алдаж, бүх гидравлик систем нь ажиллагаагүй болсон байна. Нисгэгчид хяналтгүй болсон онгоцыг 32 минутын турш удирдахыг хичээжээ.
Эцэст нь онгоц Гүнма мужийн уулын хяр мөргөсөн байна.
Онгоцонд байсан 524 хүнээс 520 нь амиа алджээ. Энэ нь нэг онгоц оролцсон ослуудаас хүний амь насны хохирлоороо түүхэн дэх хамгийн том осол хэвээр байна.
Юми онгоцны сүүл хэсэгт суудлуудын завсар дарагдсан байдалтайгаар амьд үлджээ. Тэр аарцаг болон гарынхаа ясанд хүнд гэмтэл авсан байв.
Аврагчид түүнд 14 цагийн дараа хүрч чадсан бөгөөд нурангин дундаас хөдөлж буй гарыг нь хэн нэгэн олж харснаар амьд байгааг нь мэджээ.
Ослоос долоон сарын дараа Юми дахин онгоцонд сууж, яг тэр Токио–Осака чиглэлээр ниссэн байна.
Тэр:
“Би ниссээр байхыг хүсэж байна. Мөн онгоцны үйлчлэгчээр ажилласаар байхыг хүсэж байна.”
хэмээн хэлжээ.
Юми Японы агаарын тээврийн компанид эргэн ажиллаж, олон жилийн дараа JAL-ийн ажилтнуудад нислэгийн аюулгүй байдлын талаар лекц уншин, тэр шөнийн сургамжийг хэзээ ч мартахгүй байхад хувь нэмрээ оруулсан байна.
Н.Чимэг
Сэтгэгдэл (0)
Одоогоор сэтгэгдэл байхгүй байна. Эхний сэтгэгдэлээ үлдээнэ үү!