“The MongolZ” Украйны багтай 13-нд тоглоно

Цахим спортын Counter Strike-2 тоглоомын нэгдүгээр зэрэглэлийн “ESL Pro League Season 23” тэмцээний хоёрдугаар шатны тоглолтууд үргэлжилж байна.

Монголын CS2 цахим спортын тэргүүлэгч "The MongolZ" баг плей-оффын шатанд шалгарах эрхийн төлөөх шийдвэрлэх тоглолтоо Францын "3DMAX" багийн эсрэг хийж, 2:1-ийн харьцаатайгаар ялалт байгуулсан. Тодруулбал, тоглолт гурван мапын турш үргэлжилсэн бөгөөд мап тус бүрийн үзүүлэлтээр 13:10, 4:13, 13:10 гэсэн үр дүн гарч, манай баг өрсөлдөгчөө амжилттай буулган авснаар плей-оффын шатанд өрсөлдөх эрхээ албан ёсоор халаасаллаа.

Одоогийн байдлаар “ESL Pro League Season 23” тэмцээний шөвгийн наймд тоглох эрхийг Германы “MOUZ”, ОХУ-ын “Team Spirit”, Монголын “The MongolZ”, Туркийн “Aurora Gaming”, Бразилын “Legacy”, Украйны “NAVI”, Данийн “Astralis” баг авчээ.

Шөвгийн наймын шатны тоглолтууд энэ сарын 13-аас 15-ны өдрүүдэд Шведийн Стокхольм хотын алдарт “Annexet” цэнгэлдэх хүрээлэнд зохион байгуулагдана. Энэхүү шатанд манай улсын баг тамирчид Украины "NAVI" багтай оноолт таарсан бөгөөд тоглолт 3 дугаар сарын 13-ны өдрийн 17:00 цагт эхлэх юм.