Жил бүрийн энэ өдөр зүгээр нэг баяр биш, эх орон гэдэг үнэт зүйлийн төлөө сэтгэл, хүч, амь биеэ зориулсан хүмүүсийн гавьяаг санан талархах өдөр юм. Эх орныхоо төлөө тангараг өргөсөн цэрэг, армийн салбарын хүн бүрийн баяр. Тэдэнд зориг тэсвэр тэвчээр, сахилга бат, эх оронч сэтгэл үргэлж оршиж байдаг.
Тэдний зарим нь хүйтэн салхи, халуун наранд үл ажран хил дээр зогсож, бидний тайван амьдралын баталгаа болж байдаг учраас энэ эх орны өнөөдрийн амар амгалан амьдрал бий болсон, байсаар байгаа юм.
Өнөөдөр бид цэрэг арми, зэвсэгт хүчний нийт албан хаагчдадаа талархлаа илэрхийлж, өнгөрсөн үеийн дайчид, тусгаар тогтнолыг бидэнд авчирсан хүн бүрээр бахархан дурсах ёстой билээ.
Та бүхэндээ эр зориг, аз жаргал, эрүүл энхийг хүсэн ерөөж, монгол цэргийн өдрийн баярын мэнд хүргэе.
1921 оны 3-р сарын 17-ны орой Жанжин Д.Сүхбаатар цэргүүдийн хамт Алтанбулагаас хөдөлж Хиагт хот руу довтолсон байна. Д.Сүхбаатар хотын гадуур харуул манаа тавьж хоноод маргааш нь буюу гуравдугаар сарын 18-ний өглөө Ардын журамт цэргүүд Хиагт хотод оржээ.
Хиагтын орчимд сарнин тархсан хятад цэргийг Г.Бумцэнд, Д.Нанзад нарын удирдсан цэргүүд мөрдөн хөөж, багагүй хохирол учруулсан байна. Үүгээр Ардын журамт цэрэг эх орноо чөлөөлөх тэмцэлдээ анхны ялалт байгуулж, Хиагт хотыг буулган авсан өдрөөс эхлэн энэ тэдний баярын өдөр болсон түүхтэй.
Харин 3-р сарын 18-ныг 2011 онд “Нийтээр тэмдэглэх баярын болон тэмдэглэлт өдрүүдийн тухай хууль”-ийн 5.1.2-ын “Зэвсэгт хүчний өдөр” гэснийг “Монгол цэргийн өдөр” болгон нэмэлт өөрчлөлт оруулжээ.
Сэтгэгдэл (0)
Одоогоор сэтгэгдэл байхгүй байна. Эхний сэтгэгдэлээ үлдээнэ үү!