Элон Маск хөдөлгөөний болон харилцааны бэрхшээлтэй иргэдийг дижитал ертөнцтэй холбох тархинд суулгадаг чип бүтээснээ танилцууллаа. Энэ чипийг 2023 онд АНУ-ын Хүнс, эмийн захиргаанаас (FDA) хүн дээр туршилт хийх зөвшөөрөл авснаар 2024 онд анхны суулгацаа амжилттай бүтээсэн байна.
Зоос шиг жижиг энэ төхөөрөмж нь хүний гавлын ясны тодорхой хэсгийг орлуулан суулгаж, тархины мэдрэлийн эсийн дохиоллыг шууд компьютер руу дамжуулах боломжтой юм. Мөн хүний үснээс нарийн 1,024 ширхэг электрод утаснаас бүрдэх бөгөөд тэдгээрийг тусгай зориулалтын өндөр нарийвчлалтай робот ашиглан тархины хөдөлгөөн хариуцсан хэсэгт суулгадаг байна.
"Телепати" хэмээн нэрлэгдсэн энэхүү систем нь гадаад төхөөрөмжүүдийг зөвхөн бодлын хүчээр удирдах боломжийг олгож байна. Тодруулбал, тархиндаа суулгац хийлгэсэн анхны өвчтөн Ноланд Арбо зөвхөн бодлоороо компьютерын курсорыг төвөггүй удирдаж, "World of Warcraft" видео тоглоомыг гарын оролцоогүйгээр тоглож сурсан нь технологийн ертөнцөд томоохон тэсрэлт боллоо.
Энэхүү дэвшилтэт технологи нь хөдөлгөөний болон харилцааны бэрхшээлтэй иргэдийг дижитал ертөнцтэй шууд холбосноор, тэдэнд нийгэмд тэгш эрхтэйгээр ажиллаж, амьдрах бодит боломжийг олгож байгаа юм. Ийнхүү Neuralink нь бие махбодын хязгаарлалтыг үгүй хийж, хүн бүрт ижил боломж олгох технологийн цоо шинэ эринийг эхлүүлж байна.
Сэтгэгдэл (0)
Одоогоор сэтгэгдэл байхгүй байна. Эхний сэтгэгдэлээ үлдээнэ үү!