Бялуугаа булаацалдаад сайд нараа томилж чадахгүй байгаа МАН-ын 30,38 фракцын алиных нь зөв бэ

Сахил хүртээд шал дордов гэдэг шиг юм болж олонд төдийлөн мэдэгдэхгүй байсан МАН-ын хагарал хуваагдал алган дээр тавьсан юм шиг илрэх боллоо.

Уг нь Г.Занданшатарын Засгийн газар чимээгүйхэн зохицуулж, тун нямбай, төлөв даруу хий гаргахгүй ажиллаж улсын ажлыг явуулж байсан юмсан.

МАН-д 30:38 гэж тоо бий. Энэ хоёр хоорондоо “алалцаад” уналаа. МАН-ын АН-тай үгсэн хуйвалдсан бүлэглэл нь Ерөнхий сайдаа хүчээр шахам өөрөөр нь өргөдөл өгүүлээд явуулчих шиг болсон. Бодлогогүй огцомдсон энэ асуудалдаа МАН улам бүр хямарч нуухыг нь авах гээд нүдийг нь сохлов боллоо.

Эхлээд дараагийн Засгийн газрын бүтцээ зурж үзэхгүй яав даа Учрал сайдаа. Сайдууд томилох болсон чинь 30, 38 талынхан бие биеэ аттаклаад сайдаар тавьдаггүй, эсвэл сайд болж өгдөггүй. Хуучин сайдууд нь би ажиллахгүй гээд байдаг. Эсвэл заавал тэр сайд, тийм даргыг манай талд өг гээд шантаажилдаг. Яагаад сайдуудаа томилохгүй байна вэ гэхээр сайд нарын ажлын гүйцэтгэлтэй танилцаж байна гэх ганц үгээр л сэтгүүлчдийн асуултыг аргалж өнгөрөөж байна Учрал сайд.

Ямартай ч 38 тал С.Бямбацогтыг Их хурлын даргаар зүтгүүлчихлээ. Аргагүйдээ 30 тал Ерөнхий сайдаа авсан учраас хүссэн хүсээгүй бялуугаа тэнцүүхэн хуваах ёстой. Ерөнхийлөгч Хүрэлсүхийн фракц буюу 38 тал, Л.Оюун-Эрдэнийн тал буюу 30 тал гэж бий. Фракцууд нь дотроо хэд хуваагдаж, урваж, шарваж, хольж хутгалдаж улам л эрх мэдэл албан тушаалын төлөөх дайнаа хийсээр байна.

Хохирогчид нь улс эх орны ирээдүй, ард түмэн. Тэдний бялуу хуваах маргаан өрнөсөөр буй  энэ өдрүүдэд бензиний үнэ хэд хүрч, өргөн хэрэглээний барааны үнэ яаж өсөхийг ёстой бурхан л мэдэхээр болж байна. Нэг нам байж, нэгдмэл үзэл бодол санаа зорилготой байж чаддаггүй юм бол аль нэг фракцыг нь улс төрийн тавцангаас бүр арчиж хаявал таарна. Хамгаалалтын 30-ыг уу, довтолгооны 38-ийг уу.  Харин алийг нь вэ гэдэг л чухал асуудал болоод байна. Ер нь Засаг унагааж тоглодог нь алиных нь зөв бэ. 

Нийтлэлч:Н.Ганаа