АШУИС-ийн судлаачдын хийсэн судалгаагаар айрагт агуулагддаг өвөрмөц ашигтай бичил биетнүүд нь хүний гэдэсний бичил орчинд эерэг нөлөө үзүүлж, лактаза ферментийн ялгаралтыг идэвхжүүлдэг болох нь тогтоогдсон байна.
Лактаза фермент нь сүүний чихэр болох лактозыг задалж, шингээхэд зайлшгүй шаардлагатай бөгөөд энэхүү фермент дутагдсанаас лактоз үл тэвчих зовуурь үүсдэг. Судалгаанд хамрагдсан хүмүүс гурван сарын турш өдөр бүр айраг хэрэглэснээр, оролцогчдын 80 хувь нь сүү, цагаан идээг ямар нэгэн зовуурьгүйгээр хэрэглэж чаддаг болсон байна. Онцлох нь, айраг уухаа зогсоосны дараа ч энэ эерэг өөрчлөлт хадгалагдсаар байсан нь гэдэсний бичил орчин бүрэн сэргэсэн, тогтвортой болсон болохыг илтгэжээ.
Энэхүү судалгааны үр дүн нь айргийг зөвхөн уламжлалт ундаа бус, гэдэсний эрүүл мэндийг дэмжих байгалийн пробиотик, лактоз үл тэвчих эмгэгийн эсрэг үр дүнтэй, аюулгүй шийдэл болохыг харуулж байна. Монгол эрдэмтэд энэхүү нээлтээ 2025 онд олон улсын шинжлэх ухааны хүрээнд баталгаажуулснаар, айраг дэлхийн хэмжээнд эрүүл мэндийн ач холбогдолтой бүтээгдэхүүн болох боломж улам бүр нээгдэж байна.
Сэтгэгдэл (0)
Одоогоор сэтгэгдэл байхгүй байна. Эхний сэтгэгдэлээ үлдээнэ үү!